【 နိုင်ငံတကာဆောင်းပါး 】 စိတ်ဝင်စားမှု မြင့်တက်လာသည့် တရုတ်ဘာသာစကား

နွေရာသီကျောင်းပိတ်ရက်ရောက်ပြီဆိုလျှင် ကလေးငယ်များအတွက် ဘာသာစကားသင်တန်းတို့ နေရာယူလာသည်။

လူငယ်များမှာ ခေတ်၏တောင်းဆိုမှု များပြားလာသည့်အခါ ယခင်ကာလက နွေရာသီကျောင်းပိတ်ရက်လို မဟုတ်တော့ဘဲ တစ်ဖက်က အသက်မွေးဝမ်းကျောင်းအတွက် အစပျိုးပညာရပ်တွေ သင်ကြားလာပြီဖြစ်သည်။

တစ်ချိန်က နွေရာသီကျောင်းပိတ်ရက်ဆိုလျှင် ရပ်ကွက်ထဲမှာ ကလေးများ ဆူဆူညံညံကစားခြင်းနှင့် အချိန်ကုန်သည်မျိုး မဟုတ်တော့ဘဲ ဘာသာစကားသင်တန်း၊ ကွန်ပျူတာသင်တန်း၊ ပန်းချီသင်တန်း၊ အားကစားသင်တန်းများကို တက်လာကြပြီဖြစ်သည်။

ရန်ကုန်၊ မန္တလေး စသော မြို့ကြီးများတွင် ဘာသာစကား သင်တန်းများစွာကို တွေ့ရမည်ဖြစ်သည်။ဘာသာစကား သင်တန်းများကို အွန်လိုင်းကသော်လည်းကောင်း၊ အက်ပလီကေးရှင်းကသော်လည်းကောင်း လွယ်လင့်တကူ မျိုးစုံသင်ကြားနိုင်သောခေတ် ဖြစ်လာသည်။

ကလေးကစ၍ လူငယ်၊ လူရွယ်၊ လူကြီးပိုင်းအထိ သင်ကြားမှုများလာသော ဘာသာစကားများတွင် အင်္ဂလိပ်၊ ဂျပန်၊ တရုတ်၊ ကိုရီးယား၊ ထိုင်း ဘာသာစကားများသည် မြန်မာနိုင်ငံတွင် သင်ကြားမှုများသော ဘာသာစကားများဖြစ်သည်။ထိုအထဲတွင် တရုတ်ဘာသာစကားကို လူအများ စိတ်ဝင်စားမှု ပိုမိုမြင့်တက်လာသည်။အထူးသဖြင့် မန္တလေးမြို့၊ မိုးကုတ်မြို့နှင့် ရှမ်းပြည်နယ်တို့တွင် ကလေးငယ်များကို ငယ်စဉ်ကတည်းက တရုတ်ဘာသာစကား သင်ကြားပေးမှု အခြားသောဒေသများထက် ပိုများသည်။

ယနေ့ခေတ် ပညာရေးသည် ဘွဲ့ရရုံနှင့် မပြီးသေးဘဲ ဘာသာစကားတစ်မျိုးမျိုး တတ်မြောက်ခြင်းနှင့် ကွန်ပျူတာအသုံးပြုမှုက အခြေခံဖြစ်လာသည်။အသက်မွေးဝမ်းကျောင်းနှင့် သက်ဆိုင်သော ပညာရပ်များက ထပ်တိုးပညာရပ်များဖြစ်သည်။ယခုကဲ့သို့ အသွင်ပြောင်းလာသော ခေတ်၏အခြေအနေများကို လေ့လာနေသော မိဘများကလည်း သဘောပေါက်လာကြသည်။

နိုင်ငံတိုင်းတွင် မိခင်ဘာသာစကားပြီးလျှင် အများဆုံးအသုံးပြုခြင်းမှာ ကမ္ဘာသုံးဘာသာစကားများရှိသည်။ကမ္ဘာသုံးအဖြစ် ဘာသာစကားမှာ နိုင်ငံတကာအဖွဲ့အစည်းနှင့် သံတမန်ဆက်ဆံရေးများတွင် အသုံးပြုသည့် ဘာသာစကားဖြစ်သည်။အဓိက ကမ္ဘာသုံးဘာသာစကားမှာ အင်္ဂလိပ်ဘာသာစကားဖြစ်ပြီး ပြင်သစ်၊ စပိန်ဘာသာစကားတို့လည်း ပါဝင်သည်။
ယခုအခါတွင် ကမ္ဘာသုံးဘာသာစကားများထဲ၌ တရုတ်ဘာသာစကား (Mandarin) သည် ဒုတိယမြောက် လူသုံးများသော ဘာသာစကားအဖြစ် ရပ်တည်လျက်ရှိသည်။နောက်ထပ်အသုံးများသည့် ဘာသာစကားများမှာ ရရှား၊ ဂျပန်နှင့် ပေါ်တူဂီဘာသာစကားတို့ဖြစ်သည်။

အင်္ဂလိပ်ဘာသာစကားကို နိုင်ငံပေါင်း ၇၃ နိုင်ငံတွင် ရုံးသုံးဘာသာစကားအဖြစ် အသုံးပြုကြသည်။အမေရိကန်၊ ကနေဒါ၊ UK ၊ သြစတြေးလျနိုင်ငံ၊ အာရှတွင် အိန္ဒိယ၊စင်ကာပူနှင့် အာဖရိကနိုင်ငံများတွင် အင်္ဂလိပ်ဘာသာစကားကို ရုံးသုံးဘာသာစကားအဖြစ် အသုံးပြုကြသည်။စပိန်ဘာသာစကားကို အသုံးပြုသည့် နိုင်ငံ ၂၃ နိုင်ငံရှိပြီး ပြင်သစ်ဘာသာစကားကို ရုံးသုံးဘာသာစကားအဖြစ် အသုံးပြုသည့်နိုင်ငံ ၃၄ နိုင်ငံရှိသည်။

တရုတ်ဘာသာစကားသည် ကုလသမဂ္ဂလုပ်ငန်းသုံး ဘာသာစကားခြောက်မျိုးထဲတွင် တစ်ခုအပါအဝင်ဖြစ်သည်။ကမ္ဘာ့နိုင်ငံအချို့တွင် တရုတ်ဘာသာစကားကို နိုင်ငံခြားဘာသာရပ်တစ်ခုအဖြစ် ထည့်သွင်းသင်ကြားလာကြသည်။တရုတ်နိုင်ငံ၏  မြင့်တက်လာသော စီးပွားရေးအင်အားနှင့် နိုင်ငံတကာ၌ ရင်းနှီးမြှုပ်နှံမှုများ တိုးတက်လာခြင်းကြောင့် တရုတ်ဘာသာစကား သင်ယူခြင်းက  အလုပ်အကိုင်အခွင့်အလမ်းတစ်ခုဖြစ်လာသည်။

တရုတ်နိုင်ငံသည် ကြီးမားသော နိုင်ငံအကျယ်အဝန်းနှင့် လူဦးရေထူထပ်သည့်အလျောက် နည်းပညာနှင့် စီးပွားရေးပိုင်းတွင် ကမ္ဘာ့ထိပ်သီးနိုင်ငံတစ်ခုဖြစ်သည့် အမေရိကန်နှင့် အားပြိုင်လျက်ရှိသည်။အမေရိကန်နိုင်ငံရှိ တချို့သော ထိပ်တန်းစီးပွားရေးလုပ်ငန်းရှင်များကလည်း တရုတ်ဘာသာစကား လေ့လာသင်ယူသူများလာသည်။တရုတ်နိုင်ငံသည် ကမ္ဘာထိပ်သီးနိုင်ငံတစ်ခု ဖြစ်လာသောကြောင့် နိုင်ငံတော်တော်များများတွင် တရုတ်ဘာသာစကားကို လေ့လာသင်ယူမှုများ တိုးလာခြင်းဖြစ်သည်။

မြန်မာနိုင်ငံတွင် အစားအစာ၊ အဝတ်အထည်၊ စက်ပစ္စည်း၊ လူသုံးကုန်ပစ္စည်းများအပါအဝင် တရုတ်နိုင်ငံထုတ် ပစ္စည်းများကို အများဆုံးအသုံးပြုသော နိုင်ငံဖြစ်ပြီး တရုတ်ရင်းနှီးမြှုပ်နှံမှုလုပ်ငန်းများကလည်း ထိပ်ဆုံးမှာရှိနေသည်။ယဉ်ကျေးမှု၊ စီးပွားရေးနှင့် ကုန်သွယ်ရေးတို့တွင် တရုတ်နိုင်ငံနှင့် အများဆုံးချိတ်ဆက်နေသော မြန်မာနိုင်ငံအနေဖြင့် တရုတ်ဘာသာစကားသည်လည်း အရေးပါနေသည်။

မြန်မာနိုင်ငံသည် တရုတ်နိုင်ငံနှင့် ဆွေမျိုးပေါက်ဖော်နိုင်ငံတစ်ခုဖြစ်ပြီး ကိုးကန့်၊ ဝ ကိုယ်ပိုင်အုပ်ချုပ်ခွင့်ရဒေသများတွင် တရုတ်ဘာသာစကား၊ တရုတ်ငွေကြေးများကိုသာ အဓိကအသုံးပြုလျက်ရှိကြသည်။ကိုဗစ်နောက်ပိုင်းတွင် တရုတ်နိုင်ငံသည် နိုင်ငံတကာရင်းနှီးမြှုပ်နှံမှုများကို ပိုမိုကောင်းမွန်သော အခွင့်အလမ်းများ ပေးခဲ့သည်။
တရုတ်ဘာသာ အရေးအသားများမှာ အများအားဖြင့် အတူတူဖြစ်သော်လည်း စကားပြောဆိုရာတွင် နိုင်ငံအလိုက်၊ ဒေသအလိုက် ကွဲပြားခြားနားမှုရှိသည်။တရုတ်စကားတွင် မန်ဒရင်တရုတ်ဘာသာစကားအပြင် ဒေသသုံးတရုတ်စကားများလည်းရှိသည်။
 
မြန်မာနိုင်ငံတွင် ယခင်က အင်္ဂလိပ်ဘာသာစကားကိုသာ အများစုသင်ကြားခဲ့ကြပြီး ယခုအခါ ပြည်ပသွားရောက်လုပ်ကိုင်သူ ပိုများလာသည့်အတွက် ဂျပန်၊ ကိုရီယား၊ ထိုင်း၊ တရုတ် စသည့် ဘာသာစကားများကို သင်ကြားသူများလာခြင်းဖြစ်သည်။
တရုတ်ဘာသာစကားသည် ပြည်ပသွားရောက်လိုသူများအတွက်သာမက ပြည်တွင်းအလုပ်အကိုင် အခွင့်အလမ်းများအတွက်လည်း အရေးပါလာသည်။တရုတ်စကားပြောတတ်သူများသည် ပြည်တွင်းမှာပင် အလုပ်အကိုင် အခွင့်အလမ်းကောင်းများ ရရှိလျက်ရှိသည်။

စင်ကာပူနိုင်ငံနှင့် ထိုင်ဝမ်ဒေသတို့တွင် အလုပ်-လုပ်ကိုင်လိုသူများက တရုတ်စာကို အဓိကသင်ယူမှုများပြုလုပ်ကြသည်။စင်ကာပူနိုင်ငံတွင် တရုတ်စကားနှင့် အင်္ဂလိပ်စကားကို အများစုအသုံးပြုကြသည်။လူဦးရေ ၁ ဒသမ ၂ သန်းခန့်က စင်ကာပူ မန်ဒရင်တရုတ်စကားဖြင့် ပြောဆိုကြသည်။

တရုတ်ဘာသာစကားသည် နိုင်ငံတကာတွင် ကျယ်ကျယ်ပြန့်ပြန့် အသုံးပြုနေကြသဖြင့် နိုင်ငံရပ်ခြားသို့ အလည်အပတ်သွားခြင်း၊ အလုပ်-လုပ်ကိုင်ရန်အတွက် သွားရောက်ခြင်းများတွင်လည်း တရုတ်ဘာသာစကား တတ်မြောက်ထားပါက ပိုမိုအဆင်ပြေလာသည်။

နိုင်ငံခြားဘာသာတက္ကသိုလ်များတွင် တရုတ်ဘာသာ သင်ယူနေသော လူငယ်များကို ကျောင်းပြီးသည်နှင့် ကုမ္ပဏီများက အလုပ်ပေးရန် လာရောက်ဆက်သွယ်လေ့ရှိသဖြင့် တရုတ်ဘာသာဖြင့် ကျောင်းပြီးသော ကျောင်းသားများအတွက် အလုပ်အကိုင်အခွင့်အလမ်း ပိုများနေသည်။အထူးသဖြင့် ဧည့်လမ်းညွှန်လုပ်ငန်းများတွင် တရုတ်စကားသည် လွန်စွာအရေးပါလာသည်။အဘယ်ကြောင့်ဆိုသော် တရုတ်လူမျိုးများသည် ကိုဗစ်ကပ်ရောဂါမတိုင်မီကာလကတည်းက နိုင်ငံတကာသို့ ခရီးသွားလာလည်ပတ်မှုများလာသည့် လူမျိုးဖြစ်လာသည်။

ကိုဗစ်ကာလမတိုင်မီ ၂၀၁၈-၂၀၁၉ ခုနှစ်က မြန်မာနိုင်ငံတွင် တရုတ်ခရီးသွားများ လာရောက်လည်ပတ်မှု အလွန်မြင့်တက်ခဲ့သည်။အထူးသဖြင့် ပုဂံဒေသတစ်ခုတည်းပင်၂၀၁၉ ခုနှစ်က တရုတ်ခရီးသွားဦးရေ တစ်သိန်းခွဲကျော် ဝင်ရောက်ခဲ့ကြောင်း ဟိုတယ်နှင့် ခရီးသွားညွှန်ကြားမှုဦးစီးဌာန (ပုဂံဌာနခွဲ) မှ သိရသည်။မြန်မာနိုင်ငံရှိ ထင်ရှားသော ခရီးစဉ်ဒေသများဖြစ်သည့် ပုဂံ၊ အင်းလေးဒေသတို့တွင် တရုတ်ဘာသာစကားကို သင်ကြားလိုသော ဒေသခံဧည့်လမ်းညွှန်များ တိုးလာခဲ့သည်။

အသက်မွေးဝမ်းကျောင်းပညာရပ်များစွာတွင် ဘာသာစကားတစ်ခုခု သင်ယူတတ်မြောက်ထားခြင်းကလည်း အလုပ်အကိုင်အခွင့်အလမ်းကောင်းတစ်ခုကို ရရှိစေသည်။

နည်းပညာထွန်းကားနေသော ယနေ့ခေတ်တွင် ကမ္ဘာ့နိုင်ငံအသီးသီး၏ စီးပွားရေး၊ နိုင်ငံရေး အခြေအနေများကို အလွယ်တကူရှုမြင်နိုင်သော ခေတ်ဖြစ်၍ ကမ္ဘာတွင် အင်အားကြီးလာသော တရုတ်နိုင်ငံနှင့် တရုတ်ဘာသာစကား သင်တန်းများသည် မြန်မာနိုင်ငံအပါအဝင် နိုင်ငံတကာတွင် ပေါများ၍လာနေသည်။

အမွန်