【 ဆောင်းပါး 】 အရောင်းဝန်ထမ်းတွေ မလုပ်သင့်တဲ့ အပြုအမူများ

အရောင်းဝန်ထမ်းတွေရဲ့ အဓိကတာဝန်ကို အတိုချုပ်ပြောရရင် “မိမိ‌ရောင်းချမယ့် ကုန်ပစ္စည်းအမှတ်တံဆိပ်/ဝန်ဆောင်မှုအကြောင်းနဲ့ ပြိုင်ဖက်အမှတ်တံဆိပ်တွေထက် စားသုံးသူ/သုံးစွဲသူတွေရဲ့ လိုအပ်ချက် လိုလားချက်ကို ဖြည့်ဆည်းပေးနိုင်တဲ့ ထူးခြားသာလွန်မှုကို ကောင်းစွာသိရှိပြီး၊ အဆိုပါကုန်ပစ္စည်းအမှတ်တံဆိပ်/ဝန်ဆောင်မှုကို သုံးစွဲရန် သင့်တော်မယ့် ဖောက်သည်ဆီ အရောက်သွားပြီး ညွှန်းဆိုရောင်းချကာ ဖောက်သည်က မိမိရဲ့ ကုန်ပစ္စည်းအမှတ်တံဆိပ်/ဝန်ဆောင်မှုကို နှစ်ခြိုက်စွာ အစဉ်တစိုက် စားသုံး/သုံးစွဲလျက် မိမိထံမှ အကြိမ်ကြိမ်ဝယ်ယူလာစေဖို့ ဆောင်ရွက်ရမှာ” ဖြစ်ပါတယ်။

 

အဲဒီလိုဆောင်ရွက်ရာမှာ အရောင်းဝန်ထမ်းတော်တော်များများဟာ သူတို့ပစ္စည်း/ဝန်ဆောင်မှု ရောင်းရစေရေး၊ အရောင်းသွက်စေရေးကိုသာ ဦးစားပေး ရှေ့တန်းတင်စဉ်းစားတဲ့အတွက် မလုပ်သင့်၊ မလုပ်ထိုက်တဲ့ အမှားလေးတွေကို ကျူးလွန်မိတတ်ကြတယ်။ဒီအမှားလေးတွေကြောင့် တချို့ဖြစ်ရပ်တွေမှာ ရောင်း အားတက်တတ်ပေမယ့် ရေရှည်အတွက်ကျ မကောင်းတဲ့ နောက်ဆက်တွဲရလဒ်ဆိုးတွေ ရရှိလာဖို့ အကြောင်းဖန်လာတတ်တယ်။

 

ဒါကြောင့် အရောင်းဝန်ထမ်းတွေ မှားတတ်တဲ့ အမှားလေးတွေနဲ့ မလုပ်သင့်တဲ့ အပြုအမူတွေကို သိမြင်နားလည်လာအောင် အောက်ပါအတိုင်း တင်ပြလိုက်ရပါတယ်။

 

          (၁) ဘယ်တော့မှ မလိမ်မညာပါနဲ့

 

အရောင်းဝန်ထမ်းတွေက ရောင်းချရချင်ဇောနဲ့ တစ်ခါတလေမိမိ မဖြည့်ဆည်းပေးနိုင်တဲ့ ကိစ္စတွေကို အလွယ်တကူ ကတိပေးမိတတ်ကြတယ်။တစ်ခါတလေလည်း ဖောက်သည်က လိုချင်တဲ့ အရည်အသွေး/ဝန်ဆောင်မှုမရှိဘဲနဲ့ ရှိသယောင် လှည့်စားတတ်ကြတယ်။

 

ဒါက သိပ်မှားပါတယ်။ကောင်းမွန်တဲ့ ဆက်ဆံရေးဆိုတာ ယုံကြည်စိတ်ချရမှုအပေါ်မှာ တည်ဆောက်ယူရတာဖြစ်တယ်။မိမိ တစ်ခါညာပြောမိတာ (မုသားဖြူလို့ပဲဆိုဆို) ကိုဖောက်သည်က သိသွားရင် မိမိပြောသမျှကို နောက်ဘယ်တော့မှ ယုံတော့မှာ မဟုတ်ပါဘူး။ဒါဆိုရင် တစ်ခါလေးရောင်းရအောင် လုပ်မိတာနဲ့ တစ်သက်လုံး ဖောက်သည်ပျက်သွား‌မှာဖြစ်ပါတယ်။

 

ဒါဆိုရင် မိမိရဲ့ အရောင်းသမားဘဝ တက်လမ်းကို မိမိဖာသာ ဖျက်ဆီးပစ်လိုက်သလို ဖြစ်သွားပါပြီ။ဒါထက်ဆိုးတဲ့ အကျိုးဆက်ကတော့ ဖောက်သည်တွေက မိမိကုမ္ပဏီနဲ့ပတ်သက်ပြီးအကောင်းမပြောရင်သာနေရမယ်၊ အဆိုးကိုတော့ အခမဲ့ လှည့်လည်မောင်းခတ် ကြေညာအော်ချက်ထုတ်တော့မှာ အသေအချာပါပဲ။

 

ဖောက်သည်ရဲ့ အမြင်မှာ အရောင်းသမားက သူ့လိုအပ်ချက် လိုလားချက်ကို အမြဲအလိုက်သိပြီး သူ့အကျိုးဖြစ်စေမယ့် ညွှန်းဆိုမှုတွေ၊ အကြံဉာဏ်တွေပေးတဲ့ “မိတ်ဆွေကောင်း” တစ်ယောက်ဖြစ်တယ်လို့ မြင်မှသာ သူကလည်း ကိုယ့်ကောင်းကျိုးကို ပံ့ပိုးပေးမှာဖြစ်ပါတယ်။ကိုယ့်ကို ယုံကြည်စိတ်ချပြီး ကိုယ်ပြောသမျှပြီး၊ လုပ်သမျှအောင်မှာပါ။

 

ဒါကြောင့် ရောင်းသူ၊ ဝယ်သူ ဆက်ဆံရေးထက် သာလွန်တဲ့ ဆက်ဆံရေးကောင်းကို တည်ဆောက်နိုင်သူကသာ အရောင်းဝန်ထမ်းကောင်းတစ်ယောက်ဖြစ်ပါတယ်။ကိုယ့်ကို ဂျင်းကောင်တစ်ကောင်လို့ မြင်နေရင်တော့ ကိုယ်လုပ်သမျှ ဘာမှအောင်မြင်မှာ မဟုတ်တော့ပါဘူး။

 

          (၂) လိုတာရှိမှ ပေါ်လာတဲ့သူ မဖြစ်ပါစေနဲ့

 

အရောင်းဝန်ထမ်း တော်တော်များများက မိမိဖောက်သည်ဆီကို ဈေးရောင်းချင်တဲ့ အချိန်မှပဲ ပေါ်လာတတ်ပြီး (ရွှမ်းရွှမ်းဝေအောင် စကားရော ဖောရှောတွေ သာသာထိုးထိုးပြောပြီး ကိုယ်ရောင်းချင်တာ ရောင်းပြီး) ပေါ်မလာ အဲဗားလစ် ဖြစ်သွားတတ်ကြတယ်။ဒါဟာ ဖောက်သည်နဲ့ မိမိအကြား ဆက်ဆံရေးကောင်းအောင် ထူထောင်နိုင်ဖို့အတွက် အဟန့်အတားဖြစ်စေနိုင်ပါတယ်။အထူးသဖြင့် ဖောက်သည်က တစ်ခုခုမေးချင်တာဖြစ်ဖြစ်၊ သတင်းရချင်တာဖြစ်ဖြစ်၊ ပစ္စည်းမှာ ချင်တာဖြစ်ဖြစ် မိမိကို အလိုရှိတဲ့အချိန်မှာ ရှာမရဖြစ်နေတာက သူတို့စိတ်အလိုမကျဖြစ်ဖို့ သေချာသလောက်ရှိပါတယ်။

 

အရောင်းဝန်ထမ်းကောင်းတို့ မည်သည်မှာ ဖောက်သည်က မိမိကိုအလိုရှိတဲ့အချိန်မှာ လိုအပ်တာ ဆောင်ရွက်ပေးဖို့ အမြဲအဆင်သင့်ရှိနေရပါတယ်။တကယ်လို့ မိမိမရှိနိုင်တဲ့ အခြေအနေမှာတောင် ဘယ်သူ့ကို ဆက်သွယ်ပါ၊ မိမိကတော့ ဘာကြောင့် မလာနိုင်ဘူး/လုပ်မပေးနိုင်ဘူး ဖြစ်နေတယ် စသဖြင့် ဖောက်သည် စိတ်ကျေနပ်အောင် အကျိုးသင့်အကြောင်းသင့် ရှင်းပြပြီး စီစဉ်ပေးထားတတ်ကြသူတွေဖြစ်ပါတယ်။

 

ဒါကြောင့် ဖောက်သည်တိုင်းက တစ်ခုခုဆို သူ့ကိုပဲ သတိရကြတယ်။ဒါက အရောင်းဝန်ထမ်းကောင်းအဖြစ် အသိအမှတ်ပြုခံရတာတစ်မျိုးပဲ ဖြစ်ပြီး မိမိရှေ့တက်လမ်းအတွက် အင်မတန်အဖိုးတန်တဲ့ ထောက်ခံစာဖြစ်ပါတယ်။

 

          (၃) ကိုယ့်အတွက်ကိုယ်ပဲ အမြဲမကြည့်နဲ့

 

အရောင်းဝန်ထမ်းကောင်းတွေဟာ ကိုယ်ရောင်းရဖို့၊ ကိုယ့်အရောင်းပစ်မှတ် ထိချက်ကောင်းလို့ ဆု ကြေးများများရဖို့ စတဲ့ ကိုယ့်ဖို့ပဲ ကိုယ်ကြည့်တတ်တဲ့သူတွေ မဟုတ်ပါဘူး။မိမိအကျိုးထက် ဖောက်သည်ရဲ့ စိတ်ကျေနပ်မှု၊ ဖောက်သည်အကျိုးများစေဖို့ စတာတွေကိုပဲ ဦးစားပေးစဉ်းစားပြီး လုပ်တတ်ပါတယ်။ဖောက်သည်အတွက် အကျိုးအမြတ်ကောင်းမယ့် အရောင်းပရိုမိုးရှင်းတွေရှိလာရင်လည်း ဖောက်သည်တွေကို ချက်ခြင်း ဝမ်းသာအားရ သတင်းပေးတတ်ကြတယ်။

 

ဖောက်သည်ကို ပထမဦးစားပေးထားပြီး၊ ကိုယ့်အောင်မြင်မှုအတွက်သက်သက်မဟုတ်ဘဲ ဖောက်သည်ရဲ့ စီးပွားလုပ်ငန်း တိုးတက်ဖို့ အတွက် ဖောက်သည်ရရှိမယ့် အခွင့်အလမ်းတွေ နဲ့ ဖောက်သည် ရင်ဆိုင်လာရနိုင်ခြေရှိတဲ့ စိန်ခေါ်မှုတွေကို ချိန်ထိုးစဉ်းစားပေးတတ်သလို တစ်ဖက်ကလည်း မိမိနဲ့ မိမိကုမ္ပဏီရဲ့ ရည်မှန်းချက်၊ ဦးတည်ချက်ကို မထိခိုက်စေမယ့် Win-Win ဖြစ်ဖို့ကိုသာ ရှေးရှူတတ်ကြတယ်။

 

          (၄) ဖောက်သည်တွေနဲ့ လက်လွတ်စပယ် မတွေ့ဆုံပါနဲ့

 

ဖောက်သည်တွေကို တွေ့ဆုံမှုတိုင်းဟာ အလုပ်နဲ့ပတ်သက်ပြီး လေးလေးနက်နက်ထားတဲ့ပုံစံဖြစ် ပါစေ၊ ဆိုလိုတာက လက်လွတ်စပယ် အပျော်တွေ့ဆုံတာမျိုးမဟုတ်ဘဲ၊ ဖောက်သည်ရဲ့ စီးပွားလုပ်ငန်းအတွက် အကျိုးရှိတာ တစ်စုံတရာ (အကြံဉာဏ်ဖြစ်စေ၊ သတင်းဖြစ်စေ) ပေးနိုင်အောင် ပြင်ဆင်ထားပါ။ဖောက်သည်က ကိုယ့်ကို ဖိတ်ခေါ်တွေ့ဆုံတိုင်းမှာလည်း ဖောက်သည်အလိုရှိရာကို ဖြည့်ဆည်းပေးနိုင်ဖို့ သူတို့ဆွေးနွေးတာကို သေချာအချိန်ပေးပြီး နားထောင်ပါ၊ စဉ်းစားစိတ်ကူးဆွေးနွေးပါ။မိမိက ဆောင်ရွက် ပေးမယ်လို့ ကတိပေးထားတဲ့ ကိစ္စကိုလည်း အချိန်တိုအတွင်းမှာ မြန်မြန်ပြီးစီးနိုင်အောင် အတတ်စွမ်းဆုံး လုပ်ဆောင်ပေးပါ။

 

          (၅) “ကျွန်တော့်အမှား မဟုတ်ပါဘူး” လို့ ဘယ်တော့မှ မပြောပါနဲ့

 

အရောင်းဝန်ထမ်း‌ကောင်းတွေဟာ သူတို့ကိုယ်သူတို့ ကုမ္ပဏီနဲ့ ဖောက်သည်ကြားက ကြားခံသီးခြား လူလို့ မသတ်မှတ်ကြဘဲ အဖွဲ့အစည်းနှစ်ခုကို တစ်သားတည်းဖြစ်အောင် ပေါင်းကူးပေးနေတဲ့သူတွေဖြစ်တယ်လို့ ခံယူထားတတ်ကြတယ်။မိမိ ကုမ္ပဏီရဲ့ အောင်မြင်မှုဟာ ဖောက်သည်ရဲ့ အောင်မြင်မှုပဲဖြစ်သလို၊ ဖောက်သည်ရဲ့ အောင်မြင်မှုကလည်း မိမိကုမ္ပဏီရဲ့ အောင်မြင်မှုပဲဖြစ်တယ်လို့ သဘောထားရှိကြတယ်။

 

အဲဒီသဘောကိုမဆောင်ဘဲ သွေဖီနေပြီလို့ သိတာနဲ့ “ဒါ ငါနဲ့ မဆိုင်ဘူး၊ ငါ့အမှားမှ မဟုတ်တာ” လို့ ခေါင်းရှောင်တတ်သူတွေမဟုတ်ဘဲ ဖြစ်ရတဲ့ အကြောင်းအရင်းကို ရှာပြီး ချက်ခြင်းဖြေရှင်းပစ်တတ်ကြတယ်။

 

          (၆) ကုန်ပစ္စည်း/ဝန်ဆောင်မှု ရောင်းတဲ့ ဈေးသည်သက်သက် မဖြစ်စေနဲ့

 

အရောင်းဝန်ထမ်းကောင်းတွေက သူတို့ဟာ ပစ္စည်းရောင်းတဲ့သူမဟုတ် စားသုံးသူ/သုံးစွဲသူတွေအတွက် အဖြေတစ်ခုကို ရှာပေးတဲ့သူတွေလို့ သဘောထားကြတယ်။ဆိုလိုတာက စားသုံးသူ/သုံးစွဲသူတွေရဲ့ လိုအပ်ချက်/ လိုလားချက်တစ်ခုခု ကို ဖြည့်ဆည်းပေးတဲ့ တစ်နည်းအားဖြင့် စိတ်ကျေနပ်မှု ကို ဖြည့်ဆည်းပေးမယ့် “အဖြေ” ကို ရှာဖွေအပ်နှံပေးတဲ့သူတွေဖြစ်တယ်လို့ ခံယူထားကြတယ်။ဥပမာပြရရင် “ခေါင်းကိုက်နေ လား ဒီဆေးစား” ဆိုသလို သူတို့က ဆေးကို ရောင်းတာမဟုတ်ဘူး၊ ခေါင်းကိုက်ပျောက်စေမယ့် “အဖြေ” ကို ဖော်ထုတ်ရောင်းချပေးတာဖြစ်တယ်ဆိုတဲ့ သဘောပါ။

 

ဆိုတော့ သူတို့ရဲ့ ကုန်ပစ္စည်း/ဝန်ဆောင်မှုက စားသုံးသူ/သုံးစွဲသူရဲ့ ဘယ်အခက်အခဲကို ဘယ်လိုဖြေရှင်းပေးနိုင်ပါတယ်ဆိုတဲ့ ရှုထောင့်ကိုပဲ အလေးထားတာဖြစ်ပြီး၊ မိမိရဲ့ ကုန်ပစ္စည်း/ဝန်ဆောင်မှုက ပြိုင်ဖက် ဘယ်သူဘယ်ဝါထက် ပိုသာတယ်ဆိုတဲ့ ညွှန်းဆိုရောင်းချမှုမျိုး မဟုတ်တော့ပါဘူး။

 

အဲဒီ အချက် (၆) ချက်ကတော့ အရောင်း ဝန်ထမ်း‌ကောင်းတွေမလုပ်တဲ့ အပြုအမူတွေဖြစ်ပါတယ်။

 

အရောင်းဝန်ထမ်းကောင်းတွေ မလုပ်သင့်တဲ့ကိစ္စကို သိပြီဆိုတော့ လုပ်သင့်တာတွေက ဘာတွေလဲ။ထိပ်တန်းအရောင်းသမားတွေတိုင်းမှာရှိတတ်တဲ့ အမူအကျင့်နဲ့ သူတို့ဘာတွေလုပ်ကြ သလဲဆိုတာ လေ့လာလိုက်ကြရအောင်။

 

သင်ဟာ ထူးချွန်တဲ့ အရောင်းသမားကောင်းဖြစ်တယ်ဆိုရင် သင့်အမူအကျင့်၊ တွေးခေါ်ပုံတွေနဲ့ တစ်ထပ်တည်းကျနေပါလိမ့်မယ်။အကုန်လုံး တစ်ထပ်တည်း မကျဘူးဆိုခဲ့သော် အတုယူ၊ နမူနာ ယူလိုက်ပါ။

 

အရောင်းသမားကောင်းတွေဟာ အရာရာကို ပိုင်စိုးနိုင်တယ် - ထူးချွန်တဲ့ အရောင်းသမားတွေဟာ ကုမ္ပဏီအဖွဲ့အစည်းရဲ့ အမြဲတမ်း ထိပ်တန်းစာရင်းဝင်တွေဖြစ်တယ်။အမြဲတမ်း ကြည့်လိုက်ရင် သူတို့က ထိပ်မှာပဲ၊ ကိုယ့်ကိုယ်ကိုယ်လည်း ယုံကြည်မှုသိပ်ရှိကြသူတွေဖြစ်တယ်။အပေါ်ယံကြည့်ရင် သူတို့ဟာ မွေးရာပါ ပါရမီရှင်တွေဖြစ်ပြီး အရောင်းနဲ့ပတ်သက်သမျှဟာ သူတို့အတွက် သိပ်ကိုလွယ်ကူရှင်းလင်းတဲ့ ကိစ္စဖြစ်ပြီး သူတို့ လုပ်သမျှအောင် ဆောင်သမျှပြီးတယ်လို့ အထင်ရောက်စရာဖြစ်တယ်။အမှန်က အဲဒီထူးချွန် အရောင်းချန်ပီယံတွေနဲ့ တော်၏ ရော်၏ အရောင်းသမားတွေကြားမှာ ကွာခြားမှုက စိတ်နေသဘောထားတစ်ခုပဲဖြစ်ပါတယ်။

 

တော်တယ်၊ ညံ့တယ်၊ အောင်မြင်တယ်၊ မအောင်မြင်ဘူးဆိုတာ ရွေးချယ် အရေးပေးခံရတာ၊ ဦးစားပေးခံရတာနဲ့ မဆိုင်ဘဲ မိမိအပေါ်မှာပဲ မူတည်တာပါ။

 

ထူးချွန်တဲ့ အရောင်းသမားတွေက သူတို့လုပ်သမျှတွေကို သူတို့ရဲ့ ကိုယ်ပိုင်အလုပ်လို သဘောထားပြီး စိတ်ရောကိုယ်ပါ စေတနာပါပါ အလုပ်လုပ်တတ်ကြတယ်။အလုပ်က လိုအပ်ရင် လိုအပ်သလို အချိန်မရွေး မနားမနေ မခိုမကပ် အလုပ်-လုပ်နိုင်ကြတယ်။ဒီတော့ ဤလရဲ့ ရောင်းအားအမြှင့်ဆုံးဆုကို လစဉ် နှစ်စဉ်ဆက်တိုက် သူတို့ချည်းပဲရနေတာ အဆန်းလို့ မဆိုနိုင်ပါဘူး။သူတို့ လုပ်သမျှအောင်၊ ဆောင်သမျှပြီးနေတာက ပင်ကိုယ်အတွင်းစိတ်ဓာတ် အင်အားကြီးမားကြလို့ပါ၊ ဒါကို အင်္ဂလိပ်လို့ Internal Locus of Control လို့ ခေါ်ပါတယ်။ဇွဲ၊ လုံ့လ၊ ဝိရိယ အားကောင်းတဲ့ သူတွေလို့ ဆိုနိုင်ပါတယ်။မိမိအရောင်းလုပ်ငန်းနဲ့ စပ်လျဉ်းသမျှ၊ မိမိကုမ္ပဏီရဲ့ ရောင်းအားနဲ့ စပ်လျဉ်းသမျှတို့မှာ သူ့အလုပ် ကိုယ့်အလုပ်၊ သူ့အမှား ကိုယ့်အမှားရယ်လို့ ခွဲခြားတွက်ကပ်ခြင်းမရှိဘဲ၊ အားလုံး သူတို့တာဝန်၊ သူတို့အလုပ်လို့ သဘောထားပြီး မျက်စေ့အောက်ရောက်လာသမျှ ချို့ယွင်းအားနည်းချက်အားလုံးကို ဝင်ပြီး ကူလုပ်တတ်၊ အကြံကောင်းတွေ ဝင်ပေးတတ်ကြတယ်။မင်းတို့မှအသုံးမကျဘဲဆိုတဲ့ စကားနဲ့ သူများကို အပြစ်တင်ဝေဖန်၊ ဒီလိုလုပ်ရတယ်ကွ ဆိုပြီး မောက်မာတာမျိုး လုံးဝမရှိသလို၊ မအောင်မြင်ရင် သူများကြောင့်၊ အောင်မြင်ရင် ကိုယ့်ကြောင့်ဆိုတဲ့ စိတ်ထားမျိုး သူတို့မှာ လုံးဝမရှိကြပါ။

 

ဒီတော့ အဲဒီလိုစိတ်နေသဘာဝရှိတဲ့သူ၊ အတွင်းစိတ်ဓာတ် ခွန်အားကြီးမားတဲ့သူ၊ စေတနာထက် သန်တဲ့သူတွေမှ မအောင်မြင်ရင် ဘယ်သူအောင်မြင်တော့မှာလဲ။ဒါရဲ့ အကျိုးဆက်က အလုပ်အောင်မြင်မယ်၊ ဆုကြေးတွေ အများကြီးရမယ်၊ ရာထူးတက်မယ်၊ လူကြီးသူမတွေရဲ့ ချီးမြှောက်စောင့်ရှောက်ခြင်းခံရမယ်၊ ဖောက်သည်တွေရဲ့ အားကိုးယုံကြည်မှုရမယ်ဆိုတာတွေက အကျိုးရလဒ် အကျိုးဆက်တွေအဖြစ် အလိုအလျောက် လိုက်ပါလာတော့မှာပါ။ဒါ့အပြင် မိမိကိုယ်ကို ကျေနပ်ဂုဏ်ယူမှုနဲ့ မိမိကိုယ်ကို ယုံကြည်မှု တိုးမြင့်လာတဲ့အတွက် ကိုယ်ရောစိတ်ပါ ကျန်းမာရေးကောင်းလာခြင်းဆိုတဲ့ နောက်ဆက်တွဲအကျိုးရလဒ်တစ်ခုပါ အလိုအလျောက် ရလာပါတော့တယ်။

 

ထူးချွန်တဲ့ အရောင်းဝန်ထမ်းတွေက ဘာလာလာ ဒေါင်းတယ်ဆိုတဲ့လူမျိုးတွေ - သူတို့မှာ ဘယ်လိုအခြေအနေ အခက်အခဲကိုပဲဖြစ်ဖြစ် အောင်မြင်အောင် ဖြေရှင်း၊ ထိုးဖောက်ထွက်နိုင်တဲ့ အစွမ်းတွေရှိကြတယ်။ဟိုဟာမရှိလို့၊ ဒီလို ဖြစ်လို့ လုပ်လို့ မရနိုင်ဘူး၊ မဖြစ်နိုင်ဘူးဆိုတာ သူတို့မှာ လုံးဝမရှိဘူး။ဖြစ်လာတဲ့ အခြေအနေပေါ်မှာ မူတည်ပြီး ဖြတ်ထိုးဉာဏ်နဲ့ မရှိ-ရှိတာနဲ့ အဆင်ပြေအောင် သူတို့ဖြေရှင်းနိုင်တာချည်းပဲ ဖြစ်တယ်။အခက်အခဲတွေကိုပြောဆို မြည်တွန်တောက်တီး ညည်းတွားနေတာမျိုးကို သူတို့ဆီမှာ ဘယ်တော့မှ မတွေ့ရပါဘူး။

 

ဒီလိုဆိုတော့ သူတို့က ခက်ခဲတဲ့ကိစ္စဖြစ်လာရင် ဆေးမြီးတိုနဲ့ အလွယ်လမ်းလိုက် ဖြေရှင်းလိုက်ပြီး၊ နောင်ကျ ပိုကြီးတဲ့ပြဿနာ တက်လာတာမျိုး ဆိုတဲ့ နည်းလမ်းတွေလားဆိုတော့ မဟုတ်ပါဘူး၊ သူတို့က အမျှော်အမြင်ရှိပြီး ရေရှည်အကျိုးကို အမြဲကြည့်တတ်သူတွေဖြစ်ပါတယ်။

 

အကောင်းဆုံး အရောင်းဝန်ထမ်းတွေဟာ ကျွမ်းကျင်ထူးချွန်သူတွေဖြစ်တယ် - သူတို့က သူတို့ရဲ့ အလုပ်က ဈေးရောင်းရုံသက်သက်ပဲလို့ သဘောမထားကြပါဘူး။ကုန်ပစ္စည်းကို ရောင်းတာထက် ဖြေရှင်းချက်ကိုရောင်းတာ၊ တန်ဖိုးကိုရောင်းတာ ဆိုတဲ့ အတွေးအခေါ်မျိုး သူတို့မှာရှိကြတယ်။ဒါ့အပြင် မှာတဲ့အတိုင်း ရောင်းပေးတာမျိုးမဟုတ်ဘဲ ဖောက်သည်အတွက် ပိုသင့်တော်မှာတွေကို ဦးဆောင်ညွှန်းပြ ရောင်းချနိုင်သူတွေလည်း ဖြစ်တယ်။

 

ဆိုလိုတာက သူတို့မှာ ဩဇာတစ်မျိုးရှိတယ်၊ ကိုယ့်စကားအောင်-အောင် လွှမ်းမိုးနိုင်စွမ်းရှိကြတယ်။ဒီအရည်အချင်းကလည်း အလိုလိုရလာတာတော့ မဟုတ်ပါဘူး။သူတို့က သူတို့အလုပ်နဲ့ပတ်သက်တဲ့ ဗဟုသုတကို အမြဲဆည်းပူးနေတဲ့ သူတွေဖြစ်ပြီး ကိုယ်ရောင်းချတဲ့ ကုန်ပစ္စည်းနဲ့ပတ်သက်ပြီးလည်း နှံ့စပ် နောကျေနေအောင် လေ့လာထားသူတွေဖြစ်တဲ့အပြင် မိမိကိုယ်ကို ယုံကြည်မှုမြင့်မားတဲ့သူတွေလည်းဖြစ်လို့ ဒီအရည်အချင်းတွေရှိတာပါ။အဲဒီအပေါ်မှာ အတွေ့အကြုံပါ ပေါင်းထည့်လိုက်တော့ ကျွမ်းကျင်ထူးချွန်တဲ့ အရောင်းဝန်ထမ်းတွေ ဖြစ်လာတာပေါ့။

 

လေ့လာသင်ယူမယ်၊ တွေးဆ အကြံဉာဏ်ထုတ်မယ်ဆိုရင် ကျွမ်းကျင်သူတွေ ဖြစ်လာမှာပါ။ကျွမ်းကျင်လာရင် မိမိကိုယ်ကို ယုံကြည်မှုလည်း တိုးမြင့်လာမှာဖြစ်သလို၊ အများရဲ့ စိတ်ချယုံကြည်မှုကိုလည်း ရလာမှာပါ။အဲဒါရဲ့ နောက်ဆက်တွဲ ကောင်းကျိုးကတော့ အရောင်းချန်ပီယံဖြစ်လာမှာပါပဲ။

 

အကောင်းဆုံး အရောင်းဝန်ထမ်းတွေက သူများကို ကူညီတတ်တယ် - သူတို့ဟာ သူတို့သိသမျှ ဗဟုသုတ၊ အသိပညာတွေကို လုပ်သက်နုသေးတဲ့ အရောင်းဝန်ထမ်းအသစ်တွေ၊ လုပ်သက်ရှိပေမယ့်လည်း သူသိသလို မသိသေးတဲ့သူတွေကို အမြဲတမ်းမျှဝေပေးတတ်၊ အကြံဉာဏ်ပေးတတ်၊ သင်ကြားပေးတတ်တယ်။အရောင်းပညာတင်မက သူတို့သိသမျှ ကုန်ပစ္စည်းအကြောင်း၊ ထုတ်လုပ်မှုလုပ်ငန်းစဉ်၊ ရုံးလုပ်ငန်းစဉ် စတာ တွေရော၊ ဖောက်သည်နဲ့ ဆက်ဆံရာမှာ ရှောင်ရန် ဆောင်ရန်တွေ၊ နေ့စဉ် အရောင်းလမ်းကြောင်းထွက်ရာမှာ ဘာတွေသိထားသင့်တယ်ဆိုတာတွေပါ၊ ဗဟုသုတ မျှဝေပေးတတ်တယ်။

 

လူသစ်တွေ၊ လုပ်သက်နုသေးတဲ့ လုပ်ဖော်ကိုင်ဖက်တွေဆီက ဘာမှပြန်ရဖို့ မျော်လင့်ချက်နဲ့ လုပ် တာမဟုတ်ပေမယ့် ဒီလုပ်ဆောင်ချက်တွေကြောင့် အလိုအလျောက်ရလာတဲ့ ကောင်းကျိုးတွေရှိပါတယ်။အဲဒါက သူ့ကိုယ်သူ ယုံကြည်ချက် ပိုတိုးလာတဲ့အပြင် လုပ်ဖော်ကိုင်ဖက်တွေရဲ့ အားကိုးယုံကြည်မှုပါ တိုးလာစေပါတယ်။ဒါ့အပြင် ဒီသတင်းတွေက အလုပ်ဝန်းကျင်မှာ နာမည်ကောင်းပျံ့နှံ့စေပြီး၊ အထက်လူကြီးတွေရဲ့ ယုံကြည်မှု၊ နှစ်သက်မှုကို ရလာတဲ့အတွက် မိမိအလုပ်မှာ ပိုကြီးလေးတဲ့ တာဝန်တွေ အပ်နှင်းခံရခြင်း၊ ရာထူးတက်ခြင်း၊ ဆုချီးမြှင့်ခံရခြင်းဆိုတဲ့ ရလဒ်ကောင်းတွေပါ အလိုအလျောက်ရလာမှာဖြစ်ပါတယ်။

 

အရောင်းဝန်ထမ်းကောင်းတွေက အချိန်ဆွဲ မလုပ်တတ်ဘူး - အရောင်းဝန်ထမ်းကောင်းတွေက မဆင်မခြင်၊ လက်လွတ်စပယ်လုပ်တဲ့ အကျင့်မရှိတတ်ကြဘူး။သူတို့က ဆင်ခြင်မှုအားကောင်းကြတယ်။ဒါပေမဲ့ အချိန်ဆွဲ လေးဖင့်အောင် စဉ်းစားတွေဝေနေတတ်တာမျိုးလည်းမဟုတ်ဘဲ အလုပ်ရဲ့ အရေးကြီးမှု အတိုင်းအတာအလျောက် တုံ့ပြန်ရမယ့် အချိန်အပိုင်းအခြားကိုလည်း သိတတ်တဲ့သူတွေဖြစ်တယ်။အရောင်းဝန်ထမ်းအများစုရဲ့ ချို့ယွင်းချက်ဖြစ်တဲ့ - ဖောက်သည်စုံစမ်းထားတာကို ပြန်ဖြေပေးဖို့ မေ့နေတာတို့၊ မှာထားတဲ့ပစ္စည်းကို ပို့ပေးဖို့နောက်ကျနေတာတို့၊ အရောင်းစာချုပ်အတွက် နှုတ်နဲ့သဘောတူညီမှု ရထား ပြီးလျက် ဆိုင်းထိုးဖို့ စာချုပ်ရေးသားပေးပို့ရမှာ မေ့နေတာတို့ စတဲ့ အားနည်းချက်မျိုး မရှိကြဘူး။

 

သူတို့က လုပ်စရာရှိတာကို အချိန်မဆိုင်းဘဲ မြန်မြန်နဲ့ ကောင်းကောင်းပြီးအောင် “ချက်ခြင်း” ထလုပ်တတ်တဲ့သူတွေဖြစ်တယ်။မနက်ဖြန်မှတို့၊ ထမင်းစားပြီးမှတို့ မလိုဘူး “အခု” စလုပ်မယ်ဆိုတဲ့သူတွေဖြစ်တယ်။

 

အရောင်းဝန်ထမ်းကောင်း ဖြစ်ဖို့အတွက် မလုပ်သင့်တာတွေရော၊ လုပ်သင့်တာတွေရော ပြောပြပြီးပြီဆိုတော့ ကောင်းတဲ့ အမူအကျင့် အားလုံး မိမိမှာရှိနေပြီဆိုရင်တော့ လက်မထောင် ရင်ကော့ပြီး ဆက်လုပ်လိုက်ပါ။ကောင်းတဲ့ အမူအကျင့်အားလုံးတော့ မိမိမှာမရှိသေးဘူးဆိုရင် လိုက်နာလေ့ကျင့်လိုက်ပါ။

 

မိမိအလုပ်ထဲမှာ ဒီဆောင်းပါးမှာပါတဲ့ ကောင်းတဲ့ အမူအကျင့်အားလုံးကို ကျင့်သုံးနေပြီးဖြစ်တဲ့သူတွေရှိခဲ့ရင် သူတို့ကိုနည်းပြပေးဖို့ တောင်းဆိုလိုက်ပါ။သူတို့က သင့်ကို သေချာပေါက် ဝမ်းသာ အားရ ကူညီပါလိမ့်မယ်။

 

အမူအကျင့်ကောင်းတွေ ကျင့်ကြံအားထုတ် အလုပ်-လုပ်ပြီး၊ အရောင်း‌ဝန်ထမ်းကောင်း၊ အရောင်းချန်ပီယံတွေအဖြစ် မိမိရဲ့ကုမ္ပဏီ အဖွဲ့အစည်းအတွင်းမှာ မျက်နှာပွင့်လန်း အောင်ပန်းတဝေဝေ ဆွတ်ခူးနိုင်သူတွေဖြစ်ကြပါစေကြောင်း  ၁၃၈၆ ခုနှစ် မြန်မာနှစ်သစ်ကူး အတာသင်္ကြန်ရေနဲ့အတူ ဆန္ဒပြုလိုက်ပါတယ်။

 

မေတ္တာဖြင့် …..။

 

သက်ထွန်း (သျှမ်း)