【 အလှအပနှင့် ကျန်းမာရေး 】 ညဘက်အိပ်မပျော်တာနဲ့ အိပ်ဆေးသောက်ဖို့ လိုနေပြီလား ?

ညဘက် အိပ်မပျော်တာက စိတ်အနှောက်အယှက်ဖြစ်စေပြီး စိတ်ပိုင်းဆိုင်ရာသာမက ရုပ်ပိုင်းဆိုင်ရာကိုပါ ထိခိုက်မှုကို ဖြစ်စေပါတယ်။

အရွယ်ရောက်ပြီးသား လူတစ်ယောက်အတွက် ညအိပ်ချိန် ပျမ်းမျှ ၇ နာရီမှ ၈ နာရီခန့် လိုအပ်ပါတယ်။လူတစ်ယောက်အတွက် လုံလောက်တဲ့အိပ်ချိန်ရှိမှသာ နေ့စဉ်လှုပ်ရှားသွားလာ ပြောဆိုဆက်ဆံမှုတွေ အဆင်ပြေချောမွေ့ပြီး ကိုယ်ခံအားစနစ်ကို ကောင်းမွန်စေမှာဖြစ်ပါတယ်။

ညဘက်ကောင်းကောင်းအိပ်မပျော်တဲ့အခါ ဘယ်လိုလက္ခဏာတွေ ခံစားရနိုင်သလဲ ?

- အိပ်ပျော်ဖို့ အချိန်ကြာမြင့်ခြင်း
- ညအိပ်ချိန်တွင် မကြာခဏနိုးခြင်း
- မနက်စောစီးစွာနိုးလာခြင်း
- အိပ်ရာနိုးပြီးနောက် ပြန်အိပ်မပျော်ခြင်း
- အိပ်ရာနိုးချိန်တွင် လန်းဆန်းမှုမရှိခြင်း
- ပင်ပန်းနွမ်းနယ်မှု ခံစားရခြင်း
- နေ့လယ်ခင်းအချိန်တွင် အိပ်ငိုက်ခြင်း
- အာရုံမစူးစိုက်နိုင်ခြင်း
- စိတ်ပူပန်သောကရောက်ခြင်း
- စိတ်ဓာတ်ကျခြင်း
- မှတ်ဉာဏ်ချို့ယွင်းခြင်းစတဲ့လက္ခဏာတွေခံစားရနိုင်ပါတယ်။

ဘာကြောင့် ညဘက်အိပ်မပျော်ခြင်း ဖြစ်ရတာလဲ ?

- အိပ်ရာပြောင်းတာ၊ ခရီးသွားတာ စသဖြင့် မိမိပုံမှန်အိပ်စက်နေကျ အခြေအနေကနေ
ပြောင်းလဲခြင်းကြောင့် အိပ်မပျော်ခြင်း
- ညအိပ်ခါနီး တီဗီ၊ ကွန်ပျူတာ၊ ဖုန်း စသဖြင့်
အီလက်ထရောနစ်ပစ္စည်းများ အသုံးပြုခြင်း
- ညအိပ်ခါနီး ပြည့်အင့်စွာ စားသောက်ခြင်း
- စိတ်ဖိစီးမှုများခြင်း၊ စိတ်ဓာတ်ကျခြင်း၊ စိုးရိမ်ပူပန်မှုများခြင်း
- အချို့သောဆေးဝါးများကလည်း အိပ်စက်ခြင်းကို
ထိခိုက်နိုင်ပါတယ်
- ရောဂါအခြေအနေတစ်ခုခုကြောင့် အိပ်မပျော်ခြင်း (ဥပမာ -
စားချဉ့်ပြန်ခြင်း၊ သိုင်းရွိုက်ဟော်မုန်းများခြင်း)
- ကဖင်းဓာတ်သုံးစွဲမှု များခြင်း (ဥပမာ- ကော်ဖီ၊ လက်ဖက်ရည်၊
ရေနွေးကြမ်း)
- ဆေးလိပ်သောက်ခြင်း
- ပတ်ဝန်းကျင်အနေအထားများကြောင့် အိပ်မပျော်ခြင်း
(ဥပမာ-အသံဆူညံလွန်းခြင်း၊ ရာသီဥတုပူခြင်း၊ အေးခြင်း၊
အလင်းရောင်စူးခြင်း)
စတာတွေကြောင့် အိပ်မပျော်ခြင်းဖြစ်နိုင်ပါတယ်။

ညဘက် အိပ်မပျော်ခြင်းကြောင့် ဖြစ်လာနိုင်တဲ့ နောက်ဆက်တွဲဆိုးကျိုးတွေကတော့ ...

- စိတ်ဓာတ်ကျခြင်း
- သွေးတိုးခြင်း
- နှလုံးရောဂါ
- ဆီးချိုရောဂါ
- လေဖြတ်ခြင်း
- အဝလွန်ခြင်း
- နေ့စဉ်လုပ်ဆောင်မှုများတွင် အခက်အခဲများဖြစ်ခြင်း
စတဲ့ နောက်ဆက်တွဲဆိုးကျိုးတွေ ခံစားရနိုင်ပါတယ်။

ညဘက်အိပ်မပျော်ခြင်း မဖြစ်အောင် ဘာတွေပြုလုပ်သင့်သလဲ ?

ညဘက်အိပ်မပျော်တိုင်း အိပ်ဆေးသောက်ဖို့လိုတာ မဟုတ်ပါဘူး။ညအိပ်ခါနီး အိပ်ပျော်စေမယ့် အပြုအမူလေးတွေ ပြုလုပ်ခြင်း၊ ပတ်ဝန်းကျင်ကို အိပ်ပျော်စေမယ့် အနေအထားဖြစ်အောင် ပြင်ဆင်ခြင်း စတာတွေ အရင်ပြုပြင်ပြောင်းလဲမှုလုပ်ဖို့ လိုပါတယ်။

- နေ့စဉ်အိပ်ချိန်ကို အချိန်မှန်သတ်မှတ်ထားပါ။
- နေ့လယ်ခင်းမှာ အိပ်ခြင်းကို ရှောင်ကြဉ်ပါ။
- မိမိအိပ်ရမယ့် အိပ်ရာ၊ ပတ်ဝန်းကျင်ကို သက်သောင့်သက်သာဖြစ်အောင် ပြင်ဆင်ပါ။
- (ဖုန်း၊ တီဗီ၊ ကွန်ပျူတာ) စတဲ့ အီလက်ထရောနစ်ပစ္စည်းများကို ညအိပ်ရာဝင်ခါနီး
အသုံးပြုခြင်းကို ရှောင်ကြဉ်ပါ။
- ကဖင်းဓာတ်များသော ကော်ဖီ၊ လက်ဖက်ရည်နှင့် အရက်
စတာတွေကို ညအိပ်ရာဝင်ခါနီး သောက်သုံးခြင်းကို ရှောင်ကြဉ်ပါ။
- ဆေးလိပ်သောက်ပါက ဆေးလိပ်ဖြတ်ပါ။
- ညအိပ်ခါနီး အစာစားခြင်းကို ရှောင်ကြဉ်ပါ။
- ညအိပ်ရာမဝင်ခင် ရေနွေးဖြင့် ရေချိုးခြင်း၊ အိပ်ပျော်စေမယ့်
သီချင်းမျိုး နားထောင်ခြင်း၊ စာအုပ်ဖတ်ခြင်း
စတာတွေ ပြုလုပ်နိုင်ပါတယ်။
- အိပ်စက်ချိန်မှာထွက်တဲ့ Melatonin ဟော်မုန်းပါတဲ့ ဆေးမျိုး
အသုံးပြုနိုင်ပါတယ်။
- ဒီလိုပြောင်းလဲခြင်းတွေ ပြုလုပ်ပြီးတဲ့နောက်မှာ
ညဘက်အိပ်မပျော်နိုင်ဘူးဆိုရင်တော့ တတ်ကျွမ်းနားလည်တဲ့
ဆရာဝန်နဲ့ သွားရောက်ပြသစစ်ဆေးပြီး ကုသမှုခံယူဖို့ လိုပါတယ်။
- ဆရာဝန်က စစ်ဆေးစမ်းသပ်မှုတွေ ပြုလုပ်ပြီးနောက်မှာ
အိပ်ဆေးသုံးဖို့ လို၊ မလို ဆုံးဖြတ်ပေးပါလိမ့်မယ်။
- အိပ်ဆေးဟာ တားမြစ်ဆေးအမျိုးအစားထဲမှာ ပါတာဖြစ်လို့
မိမိ မိတ်ဆွေ၊ သူငယ်ချင်းတွေဆီက ရတဲ့ အိပ်ဆေးကို
ယူသောက်တာမျိုး၊ ကိုယ့်သဘောနဲ့ကိုယ် ဆေးကိုစွဲသောက်တာမျိုး
မလုပ်သင့်ပါဘူး။

DR.Phyu
Photo Credit - freepik