【 နိုင်ငံတကာဆောင်းပါး 】" အမျိုးသားရေးဝါဒဘက်သို့ ခြေဦးပြန်လှည့်သော ပြင်သစ်"

【 နိုင်ငံတကာဆောင်းပါး 】" အမျိုးသားရေးဝါဒဘက်သို့ ခြေဦးပြန်လှည့်သော ပြင်သစ်"

အခြေအနေအရပ်ရပ်အရ ပြင်သစ်သမ္မတ အီမန်နူရယ် မက်ခရွန်သည် တနင်္ဂနွေနေ့တွင်ကျင်းပမည့် ရွေးကောက်ပွဲကို အလွယ်တကူနိုင်သင့်သည်။ နိုင်ငံရေးအရ အလယ်ဗဟိုဝါဒီအနေအထားကို ယူထားသောကြောင့် သူသည်လွန်ခဲ့သော ၅ နှစ်က ပြတ်ပြတ်သားသား အနိုင်ယူခဲ့သည့် မာရိန်လီပန်းကို အနိုင်ရရန် လက်ဝဲအင်အားစုများကို ဆွဲဆောင်သင့်သည်။ ထိုသို့ အနိုင်ရပြီးနောက်တွင် မက်ခရွန်သည် ပြင်သစ်နိုင်ငံကို ငြိမ်းချမ်းအောင်လုပ်ဆောင်ကာ ပြင်သစ်၏ နိုင်ငံတကာဦးဆောင်မှု အခန်းကဏ္ဍကို ထူထောင်သည်။

သို့သော်သူသည် အလုပ်သမားလူတန်းစားမဲဆန္ဒရှင်များကို စာနာကြောင်းပြသရန် ရုန်းကန်နေရသည်။ ထို့အပြင် အမေရိကန် ပြည်ထောင်စုတွင်ကဲ့သို့ပင် နိုင်ငံခြားရေးမူဝါဒသည် ထုံးစံအားဖြင့် မဲအနည်းငယ်သာ ရရှိသည်။ သို့သော် သူ၏မူဝါဒများသည် ထိုသို့မဟုတ်ပေ။ အာဖရိကနှင့် အရှေ့အလယ်ပိုင်းတွင် ပြင်သစ်က အလျင်အမြန် ဝင်ရောက်ဆောင်ရွက်သော်လည်း ထိုဒေသများမှ ပြင်သစ်၏ သြဇာကျဆင်းခြင်းကို တားဆီးနိုင်ခြင်းမရှိပေ။ ရုရှားကို ဆွဲဆောင်သိမ်းသွင်းရန် သူ၏ အားထုတ်မှုများသည်လည်း အရာမထင်လှပေ။

ဘလွန်းဘတ်သတင်းဌာနဆောင်းပါးရှင် သီရီဆီရာဖယ်က ယူကရိန်းစစ်ပွဲနောက်ပိုင်းတွင် “မက်ခရွန်ရဲ့ စိတ်ကူးယဉ်တဲ့ မဟာဥရောပ အစီအစဉ်က ပျက်စီးသွားပြီ။ ပြင်သစ်ရဲ့တာဝန်ဟာ ဥရောပကို ပြင်သစ် ဦးဆောင်မှုအောက်မှာ ကြီးကျယ်ခမ်းနား ထူခြားတဲ့ လူ့အဖွဲ့အစည်း အဖြစ်ပြန်လည်ထူထောင်ဖို့ဟာ ပြင်သစ်ရဲ့ တာဝန်လို့ သူသတ်မှတ်ခဲ့တယ်။ အခြားအင်အားကြီးနိုင်ငံတွေကို ချိန်ခွင်လျှာညှိပေးပြီး သေနင်္ဂဗျူဟာကျတဲ့ လွတ်လပ်မှုရတဲ့ လုံခြုံရေး သေနင်္ဂဗျူဟာကို သူလိုချင်တယ်” ဟုရေးသားသည်။ သို့သော် ဥရောပတိုက်သည် ယခုအခါတွင် ရုရှား၏ ခြိမ်းခြောက်မှုကို ပိုမိုခံစားလာရပြီး အမေရိကန်ပြည်ထောင်စုကို ပိုမိုမှီခိုလာရသည်။

မက်ခရွန်အတွက် ပိုမိုဆိုးရွားသော အတိတ်နိမိတ်မှာ ပြင်သစ်နိုင်ငံရေးစနစ်သည် ပိုမိုကျယ်ပြန့်သည် အမျိုးသားရေးနှင့် အစွန်းရောက်ဘက်သို့ ဦးတည်လာခြင်းဖြစ်သည်။ ရွေးကောက်ပွဲဝင်မည်ဖြစ်ကြောင်း ကြေညာရန်နောက်ကျပြီး ပထမအကျော့ရွေးကောက်ပွဲမတိုင်မီ စကားစစ်ထိုးပွဲလုပ်ရန် ငြင်းဆိုသော မက်ခရွန်သည် အသက် ၆၀ အထက်မဲဆန္ဒရှင်များအကြားတွင်သာ အနိုင်ရပြီး မဲပေးထောက်ခံသူနည်းလာကာ အသက် ၁၈ နှစ်မှ ၂၄ နှစ်အကြား မဲဆန္ဒရှင်များအကြားတွင် တတိယနေရာသာရသည်။

ပထမအကျော့ရွေးကောက်ပွဲမှ မဲထက်ဝက်ကျော်သည် လက်ဝဲစွန်းနှင့် လက်ယာစွန်း ကိုယ်စားလှယ်များထံ ရောက်သွားသည်။ မဲဆန္ဒရှင်များသည် အလယ်အလတ် လက်ဝဲနှင့်လက်ယာသမားများဖြစ်သည့် ရီပတ်ဗလစ်ကန်များနှင့် ဆိုရှယ်လစ်များကို ဖယ်ရှားလိုက်သည်။ ထိုပါတီများသည် မက်ခရွန်က ပါတီသစ်ဖြင့် အနိုင်ရသည့်ကာလမတိုင်မီအထိ အစဉ်အလာအားဖြင့် အနိုင်ရနေသော ပါတီများဖြစ်သည်။ ထို ၂ ပါတီပေါင်းလျှင် မဲ ၇ ရာခိုင်နှုန်းသာရပြီး လွန်ခဲ့သော ဆယ်စုနှစ်က မဲ ၅၆ ရာခိုင်နှုန်းနှင့် လွန်ခဲ့သော ၅ နှစ်က ၂၆ ရာခိုင်နှုန်းတို့ဖြင့် နှိုင်းယှဉ်ကြည့်နိုင်သည်။ ၂ ပါတီလုံးသည် ရွေးကောက်ပွဲကုန်ကျစရိတ်အတွက် အစိုးရက ပြန်လည်ထုတ်ပေးရန်လိုသည့် မဲ ၅ ရာခိုင်နှုန်းပင်မရတော့ပေ။ ပတ်ဝန်းကျင် စိမ်းလမ်းရေးဝါဒီများလည်း မဲမရပေ။ လက်ယာသမ္မတလောင်းဖြစ်ပြီး လွန်ခဲ့သော ၃ လကမှပါတီထောင်သည့် သတင်းသမားတစ်ဦးက မဲ ၇.၁ ရာခိုင်နှုန်းရပြီး အစဉ်အလာအရ အနိုင်ရနေသောပါတီများကို ချေမှုန်းလိုက်သည်။

မက်ခရွန်သည် လူပိန်းကြိုက် တောင်းဆိုမှုများကို ပြုလုပ်နေပြီး အနိုင်ရမည်ဟု ခန့်မှန်းနေကြဆဲဖြစ်သည်။ ဥပမာ အားဖြင့်ဆိုရပါက အီကောနောမစ်စာစောင်က မက်ခရွန် နိုင်ခြေ ၉၃ ရာခိုင်နှုန်း ရှိသည်ဟုဆိုသည်။  သို့သော် မဲအနိုင်အရှုံးသည် အနည်းငယ်မျှသာကွာခြားမည်ဖြစ်သည်။ လွန်ခဲ့သော ၅ နှစ်က ဒုတိယအကျော့ ရွေးကောက်ပွဲတွင် သူသည်မဲ ၃ ပုံ ၂ ပုံရသည်။ နောက်ဆုံးကောက်ယူသောစစ်တမ်းအရ မက်ခရွန်သည် ၅၆ ရာခိုင်နှုန်းသာ ရသည်။

ယခုရွေးကောက်ပွဲတွင် အကြိတ်အနယ်ဖြစ်စေမည့် အကြောင်းများစွာရှိနေသည်။ လီပန်းသည် သူမ၏ ဖခင် တည်ထောင်ခဲ့သော National Rally ပါတီ၏ မူလလက္ခဏာများဖြစ်သော ဗြောင်ကျသည့် နိုင်ငံခြားသား မုန်းတီးရေးနှင့် ဂျူးဆန့်ကျင်ရေးများကို ပစ်ပယ်ထားသည်။ ထို့အပြင် သူသည် ယခင်က ဥရောပ သမဂ္ဂကို ဝေဖန်ခြင်းကို အလေးမထားတော့ဘဲ ဘဏ္ဍာရေးနှင့် အခြားလူထုထောက်ခံသော ပြဿနာများကို အာရုံစိုက်သည်။ ထိုပြဿနာများတွင် လူနေမှုစရိတ်၊ အများပြည်သူဆိုင်ရာဝန်ဆောင်မှုများ၊ လူမှု မညီမျှမှုများ၊ မက်ခရွန်အဆိုပြုထားသည့် အငြိမ်းစားလစာ ပြုပြင်ပြောင်းလဲရေး၊ နိုင်ငံသားများအတွက် အလုပ်နှင့် ဝန်ဆောင်မှုများနှင့် လူထုဆန္ဒခံယူပွဲဖြင့် တော်လှန်ခြင်းဟု သူခေါ်သည် ဆန္ဒခံယူပွဲ ကျင်းပရေးတို့ ပါဝင်သည်။

ထို့အပြင် လက်ဝဲသမားများနှင့် မက်ခရွန်နှင့်အဆင်မပြေပေ။ မက်ခရွန်သည် အာဏာရလာသောအခါ လက်ယာသို့ယိမ်းသွားသည်။ သူသည်ယခုအခါ လမ်းမများတွင် ရဲတပ်ဖွဲ့ဝင် ၂ ဆတိုးရေးကို ကတိပြုပြီး တရားဥပဒေစိုးမိုးရေးကို အာရုံစိုက်ပြီး လက်ယာမဲဆန္ဒရှင်များကို စည်းရုံးသည်။ ထို့အပြင် အချို့ လက်ဝဲယိမ်း အမျိုးသားရေးဝါဒီများကလည်း အခြေအနေကို ပြောင်းပြန်လှန်ပစ်ရန် လီပန်းကို ထောက်ခံကြသည်။ ဘာနေးဆန်းဒါးကို ထောက်ခံသူများက ထရမ့်ကိုမဲပေးကြသည့်  ၂၀၁၆ ခုနှစ် အမေရိကန်ရွေးကောက်ပွဲအတိုင်း လီပန်းသည် ပထမအကျော့ရွေးကောက်ပွဲအတွင်း ဂျန်လတ်မီလန်ချွန်ကို မဲပေးခဲ့သည့် သဘောထားတင်းမာသော လက်ဝဲမဲဆန္ဒရှင်များ၏ မဲများကို ရရှိမည့် အလားအလာရှိနေသည်။ သူသည် ပထမအကျော့ရွေးကောက်ပွဲ ရှုံးနိမ့်ကြောင်း ဝန်ခံစဉ်က လီပန်းကို ဝေဖန်သော်လည်း မက်ခရွန်ကို ယခုအချိန်အထိ ထောက်ခံခြင်းမရှိပေ။

လီပန်းအနိုင်ရမည့် အလားအလာသည် ဘရပ်ဆဲလ်နှင့် ဥရောပအစိုးရအများစုကို လွှမ်းမိုးနေသည့် ဥရောပပညာတတ်အထက်လွှာကို အထိတ်တလန့်ဖြစ်စေသည်။ ထိုသို့သော ရလဒ်မျိုး မဖြစ်နိုင်ဟု တစ်ခါက မြင်ခဲ့သော်လည်း ၂၀၁၆ ခုနှစ်က ဗြိတိန်လူထုသည် ဥရောပသမဂ္ဂမှထွက်ရန် မဲပေးပြီး ခွဲထွက်ရေး ထောက်ခံသူများကိုပင် တုန်လှုပ်စေခဲ့သည်။ ထို့အပြင် လီပန်းသည် ၂၀၁၇ ခုနှစ်ကထက်သာလွန်ပြီး မက်ခရွန်နှင့် မဲမတိမ်းမယိမ်းဖြစ်လာသည်။

လီပန်း အနိုင်ရပါက ဥရောပအတွင်း ရုရှားနှင့်ပတ်သက်သည့် သဘောထားကွဲလွဲမှု ပိုမိုကြီးမားလာမည်ဖြစ်သည်။ ယူကရိန်းသို့ ထောက်လှမ်းရေးသတင်းပေးခြင်းနှင့် အခြားကာကွယ်ရေး အကူအညီများကို ထောက်ခံသော်လည်း အကူအညီပေးခြင်းနှင့် စစ်ပွဲတွင်ပါဝင်ပတ်သက်ခြင်းအကြား ခြားထားသောစည်းသည် ပါးလှပ်ကြောင်းသူသတိပေးသည်။ အရေးယူပိတ်ဆို့မှုများသည် ပြည်တွင်းစီးပွားရေးကို ထိခိုက်စေသည်ဟု သူဝေဖန်သည်။

ထို့အပြင် ယူကရိန်း စစ်ပွဲပြီးဆုံးသွားပါက မော်စကိုနှင့်ဆက်ဆံရေးတိုးတက်အောင်လုပ်ရန် သူတိုက်တွန်းသည်။ “ယူကရိန်း-ရုရှားစစ်ပွဲပြီးသွားပြီး ငြိမ်းချမ်းရေး စာချုပ်ချုပ်နိုင်တာနဲ့ နေတိုးနဲ့ရုရှားအကြား ပြန်လည်သင့်မြတ်ရေး အကောင်အထည်ဖေါ်ဖို့ တောင်းဆိုတယ်.” ဟုသူပြောသည်။

သူအနိုင်ရပါက ဥရောပတိုက်တွင် ဗြိတိန်ဥရောပသမဂ္ဂမှ ထွက်ခွာစဉ်ကထက် ပိုမိုပြင်းထန်သည့် လူထုသဘောထားကို တွေ့ရနိုင်သည်။ အမေရိကန်ပြည်ထောင်စုသည့် ၎င်း၏ဦးဆောင်မှုကို မဟာမိတ်ပြင်သစ်က စိန်ခေါ်လာသည်ကို တွေ့ရမည်ဖြစ်သည်။

 

Ref: Theamericanconservative: France Turning Back to Nationalism

 

Linko