【 အနုပညာ 】ကျိုက်ထီးရိုးတောင်တစ်ဝိုက်က အထမ်းသမား အိမ်ထောင်စု ၉၀၀ အတွက် ထူးအယ်လင်းဦးဆောင်၍ အလှူရှင်များကလှူဒါန်း

အခုလို COVID ကာလမှာ ကျိုက်ထီးရိုးတောင်တန်းဒေသတစ်ဝိုက်မှာ လုပ်ကိုင်စားသောက်နေကြတဲ့ အထမ်းသမား မိသားစုတွေအတွက် စားဝတ်နေရေးအခက်အခဲကို တေးသံရှင် ထူးအယ်လင်း ဦးဆောင်ကာ အလှူရှင်တွေက ဒီကနေ့(နိုဝင်ဘာ ၂၁ရက်)က သွားရောက်လှူဒါန်းခဲ့ကြပါတယ်။

 

“ဒီလိုကာလမှာ အထမ်းသမားတွေလည်း ခက်ခဲကြပါတယ်၊ ဘုရားဖူးတွေမရှိတော့ သူတို့ဆိုရင် ပိုတောင်မှ ခက်ခဲကြတာပါ၊ ဒါကြောင့်လည်း အထမ်းသမားတစ်အိမ်ထောင်ကို ဆန် ၆ ပြည်၊ ကြာဆံ တစ်ထုပ်၊ ကုလားပဲဝါ ၅၀ ကျပ်သားတစ်ထုပ်၊ တစ်ပတ်စာ စားနိုင်တဲ့ ငပိကြော်ထုပ်တစ်ထုပ် အစရှိတဲ့ ရိက္ခာတွေကို ကျိုက်ထီးရိုး တောင်ပေါ်မှာ မှီတင်းနေထိုင်ကြတဲ့ အထမ်းသမားအိမ်ထောင် ၉၀၀ ကျော်ကို ကျွန်တော်တို့ ဒီနေ့ (နိုဝင်ဘာ ၂၁ ရက်)မှာ သွားရောက် ဝေမျှကူညီပံ့ပိုးခဲ့ပါတယ်၊ တောင်ခြေကနေ ကြိုတင်ပြီးတော့ သူတို့အိမ်ထောင်စုတွေ စာရင်းကောက်ယူပြီး ဝေမျှခဲ့တာ ဖြစ်ပါတယ်”လို့ တေးသံရှင် ထူးအယ်လင်းက ရှင်းပြပါတယ်။ 

 

ထိုကဲ့သို့ လှူဒါန်းမှုတွေကို ၎င်းက ကျပ်ငါးသိန်း မ တည်ကာ ဦးဆောင်ခဲ့ပြီး ပံ့ပိုးသူအလှူရှင်တွေရဲ့ အကူအညီဖြင့် လှူဒါန်းခဲ့တာဖြစ်ပါတယ်။ ဒါ့အပြင် လှူဒါန်းမှုတွေအပြီးမှာ တေးသီချင်းတွေနဲ့ သီဆိုဖျော်ဖြေရင်း စိတ်ခွန်အား မြင့်မားစေဖို့ လုပ်ဆောင်ခဲ့တယ်လို့ သိရပါတယ်။

 

တေးသံရှင် ထူးအယ်လင်းဟာ အခုလိုကာလမှာ အနုပညာအလုပ်တွေထက် ပရဟိတအလုပ်တွေကို ပိုမို လုပ်ဆောင်နေပြီး ဘုရားထီးတင်တာတွေ၊ ကျေးလက်ဒေသတွေမှာ လမ်းခင်းတာတွေကို လုပ်ဆောင်ခဲ့တဲ့အပြင် ကျိုက်ထီးရိုးတောင်မှာလည်း အခုလိုလုပ်ဆောင်ခဲ့တာဖြစ်ပါတယ်။

 

 “ကျွန်တော့် အနေနဲ့တော့ အခုလိုကာလမှာ ပရဟိတအလုပ်ကလေးတွေနဲ့ ဖြတ်သန်းသွားပါမယ်၊ ဒီလိုပဲမှန်းထားတယ်လေ၊ ကျွန်တော့်ရဲ့ ရည်ရွယ်တာတွေဖြစ်ဖို့ ဝိုင်းဝန်းကူညီပေးကြတဲ့သူတွေကိုလည်း အရမ်းကျေးဇူးတင်ပါတယ်၊ အခက်အခဲရှိတဲ့သူတွေ။ စားဝတ်နေရေးအတွက် လိုအပ်နေတဲ့သူတွေကို ကျွန်တော်တို့ ဒီလိုမျိုး သွားရောက် လှူဖို့လုပ်သွားမှာပါ”လို့ ၎င်းက ဆက်လက်ရှင်းပြခဲ့ပါတယ်။

 

 

 မင်းခေတ်လင်း 

(ဓာတ်ပုံ- ကိုနိုင် NG)

ရန်ကုန်၊ နိုဝင်ဘာ ၂၂ 

 

(  Zawgyi  )