【 နည်းပညာ 】စမတ်ဖုန်းလွတ်ကျတတ်သူတွေအတွက် LG K42

ကိုရီးယားနည်းပညာကုမ္ပဏီကြီး LG ကတော့ စမတ်ဖုန်းဈေးကွက်မှာ အရှုံးပေါ်နေတယ်ဆိုပေမယ့် စမတ်ဖုန်းသစ်တွေကိုတော့ ဆက်လက်မိတ်ဆက်နေတာကို မြင်တွေ့ရပါတယ်။

 

ယခုလည်း လွတ်ကျတာ၊ ထိခိုက်မိတာတွေကို ခံနိုင်မယ့် အကြမ်းခံစမတ်ဖုန်းတစ်လုံးကို မိတ်ဆက်လိုက်တယ်လို့လည်း သိရပါတယ်။

 

LG K42 လို့ အမည်ရတဲ့ LG ရဲ့ စမတ်ဖုန်းသစ်ဟာ စွမ်းဆောင်ရည်ပိုင်းအရတော့ သာမန်စမတ်ဖုန်းတစ်လုံးထက်မပိုပါဘူး။ဒါပေမယ့် ထူးခြားချက်ရှိပြီး၊ ၎င်းစမတ်ဖုန်းဟာ စစ်တပ်အဆင့်ကို အကြမ်းခံနိုင်မယ်လို့ LG က ဆိုထားပါတယ်။ဒီစမတ်ဖုန်းဟာ ခနခန ဖုန်းလွတ်ကျတတ်သူတွေအတွက်တော့ အကြိုက်တွေ့စရာ စမတ်ဖုန်းလည်းဖြစ်လာမှာ သေချာပါတယ်။ဒါ့အပြင် ဈေးနှုန်းကိုလည်း $150 သာ သတ်မှတ်ထားတဲ့အတွက် ဈေးနှုန်းချိုသာတယ်လို့ ဆိုရမှာဖြစ်ပြီး၊ LG ဘက်ကလည်း LG K42 စမတ်ဖုန်း နှစ်နှစ်အတွင်း မှန်ကွဲခဲ့ရင် ပြန်လဲပေးမယ်လို့လည်း အာမခံထားပါသေးတယ်။

 

LG K42 ရဲ့ စွမ်းဆောင်ရည် အပြည့်အစုံကတော့ ၆.၆ လက်မ အရွယ်အစားရှိတဲ့ 720x1600 resolution အဆင့် မျက်နှာပြင်ကို တပ်ဆင်အသုံးပြုပေးထားပြီး၊ မမ်မိုရီ 3GB နဲ့ သိမ်းဆည်းနိုင်မှု 64GB ပါဝင်မှာဖြစ်ပါတယ်။ MediaTek ရဲ့ Helio P22 chipset နဲ့ မောင်းနှင်ပေးထားတာဖြစ်ပြီး၊ microSD ကဒ်ကို ထပ်စိုက်တာ သိမ်းဆည်းနိုင်မှုကို ထပ်မံတိုးမြှင့်နိုင်ပါသေးတယ်။

 

ကင်မရာပိုင်းမှာတော့ ရှေ့၊ နောက် ကင်မရာစုစုပေါင်း ၅ လုံးပါဝင်ပြီး၊ နောက်ဘက် ကင်မရာ ၄ လုံးကတော့ 13MP အဓိက ကင်မရာ၊ မြင်ကွင်းကျယ် 5MP ultrawide, အနီးကပ် 2MP macro နဲ့ ရုပ်ထွက်တိကျဖို့ 2MP depth တို့ဖြစ်ပြီး၊ ရှေ့ဘက် ကင်မရာကတော့ 8MP ဖြစ်ပါတယ်။

 

ဘက်ထရီ 4,000 mAh ကတော့ နည်းတယ်လို့ မဆိုနိုင်ပါဘူး။လူမှုကွန်ယက်သုံးတာ၊ သီချင်းနားထောင်တာ၊ မေးလ်စစ်တာတွေလောက် အသုံးပြုမယ်ဆိုရင် မေ့လောက်အောင်ကို အသုံးပြုနိုင်ပါတယ်။လက်ဗွေဖတ်ကိရိယာကိုတော့ စမတ်ဖုန်းဘေးဘောင်မှာ တပ်ဆင်ထားပြီး၊ အကြမ်းခံအဆင့် MIL-STD 810G စစ်တပ်အဆင့် ထောက်ခံချက် ရရှိထားပါတယ်။

 

တစ်ခုသတိပေးလိုတာက LG K42 ဟာ ဂိမ်းကစားဖို့မဟုတ်ပါဘူး၊ သူ့ရဲ့ စွမ်းဆောင်ရည်ဟာ သာမန်ပါပဲ။အကယ်လို့ သင်ဟာ ဂိမ်းအသားပေးမယ်ဆိုရင် LG K42 ကို မရွေးသင့်ပဲ၊ အကြမ်းခံပြီး သာမန်စွမ်းဆောင်ရည်နဲ့ စမတ်ဖုန်းဆိုရင်တော့ LG K42 ကိုသာ ရဲရဲကြီးရွေးချယ်လိုက်ဖို့ အကြံပြုလိုက်ပါတယ်။

 

Damien 

 

(  Zawgyi  )